Laerskool George-Suid - Omgee

Omgee

Volhoubaar, Veerkragtig en Onstuitbaar – ons tema vir die jaar. Ons almal weet dat ‘n driedubbele tou nie so maklik soos ‘n enkeltou breek nie. Spanwerk dra by tot groter volhoubaarheid, veerkragtigheid en onstuitbaarheid!

Niemand kan gee wat hy nie het nie. Ons hoor baie mens kan nie skink uit ‘n leë koppie nie. Ons het nodig om na onsself te kyk. Ons het ook nodig om na mekaar te kyk. Daar is tye wat ‘n mens nie alleen kan staan nie, wanneer als net oorweldigend is. Tye wat jy ‘n vriend nodig het om jou op te lig en te ondersteun. Ons almal het iemand nodig om ons raak te sien en te waardeer. Om te voel ons het waarde, kan waarde tot ons omgewing toevoeg.

Om om te gee… respek vir ander te hê en dit uit te leef. Dit dra by tot my gevoel van waarde toevoeg – om te behoort.

Ons hoor so baie van die millennium kinders wat ‘entitled’ voel. ‘n Goeie teenvoeter hiervoor is die vermoë om om te gee vir ander – empatie te toon.

Een oggend stop ek by die skool, net betyds om te sien hoe ‘n prefek af buig om met ‘n kleiner kind te gesels en hom dan ‘n ‘high five’ gee – die seuntjie lag van oor tot oor! Mens kan sommer sien hoe trots hy voel, hoeveel waarde hy ervaar dat iemand hom raaksien en reageer.

Om om te gee vra so min, maar kan so baie beteken. Dit vra dat ek ‘n ander persoon raaksien. Myself ‘n paar oomblikke in sy skoene sit, en net reageer. ‘n Jong dame wat sendeling werk in Malawi gaan doen het, skryf in haar boek; “Kisses from Kate” dat sy totaal oorweldig was deur die groot nood en verward was en nie geweet het hoe om te help nie. Tot sy besef het, sy kan net die een wat voor haar staan help. Wat sou gebeur as ek en jy net die persoon wat voor ons staan, help.

Louis Buschalge noem dat indien jy iemand nie kan help nie, jy hom net nie moet seermaak of verneder nie.

Wanneer ons emosioneel oorweldig voel reageer ons dikwels met veg, vlug of vries. Dis dan wat ons ander onwetend seermaak. Om dan net eers asem te haal en ‘n oomblik te neem, bring dikwels ‘n oomblik van rustige helderheid. ‘n Groot stap in emosionele intelligensie en die volhoubaarheid daarvan. Wanneer ek eers asem skep, kry ek kans om te dink, my eie emosie te identifiseer en te hanteer – ek kry ook ‘n oomblik om die ander een se reaksie raak te sien. Sy seer, onsekerheid of angs.

Ons kan mekaar help en oplig as ons bereid is om asem te skep en oop te wees vir ‘n ander se emosies. Wanneer ek verstaan dat iemand anders ook emosies ervaar wat van myne kan verskil en ek bereid is om dit te akkomodeer, wen ons albei! Groei ons albei emosioneel na ‘n sterker volwassene wat mense met emaptie kan bemagtig en ondersteun. Daardeur bemagtig ek ook myself.

Dus liewe ouers, kom ons vat hande en leer ons kinders om asem te skep, om om te gee en om onsself nie so ernstig op te neem nie!

Wanneer ons, ons emosies kan erken en hanteer en ‘n ander se emosie kan erken, kan ek meer volhoubaar en emosioneel weerbaar die lewe hanteer.

Ons het mekaar nodig! Empatie en deernis begin by die huis en die gesin. Om om te gee vir mekaar, mekaar raak te sien en te waardeer! Te verstaan dat elkeen verskil en dat dit “okay” is. Kom ons begin die week deur elke dag vir mekaar 1 ding te sê wat ek in jou waardeer.

Deur mekaar op te bou, bou ek aan my eie emosionele weerbaarheid!

“ To make a difference in someone’s life you don’t have to be brilliant, rich, beautiful or perfect. You just have to care.”
Mandy Hale

Geskryf deur: Tronel van Rooyen (LGS Berader)

VORIGE UITGAWES

admin
6 April 2022

Omgee

admin
14 Februarie 2022

Swem of sink

admin
2 Desember 2021

Dissipline

admin
19 Oktober 2021

Positiewe ingesteldheid

admin
20 September 2021

Glo jy kan

admin
5 Augustus 2021

Ek kan

admin
5 Julie 2021

Hoop

admin
1 Junie 2021

Ek het waarde