Boelies

Ons weet van hulle en ons ken hulle. Ons weet net nie altyd hoe om hulle te hanteer nie. Of dit in die werksplek, vriendekring of dalk by jou familiebraai is. 

Ek doen tans my prakties as maatskaplike werk student by Laerskool George-Suid. Hier het ek ‘n projek  aangepak in samewerking met die berader vir my groepwerk en gemeenskapswerk. 

Ons het saam met die onderwysers ‘n paar kinders geïdentifiseer om op te lei as “Bully Bouncers” en het ‘n paar groepe aangebied om hulle te bemagtig. Hulle is ook aangemoedig om nie net stil te bly nie, maar ook om op te tree deur ‘n personeellid in te lig , asook om te weet wanneer hulle boelies raaksien of dit ervaar en om te kan onderskei of dit wel boeliegedrag is of nie. 

Eerstens moes ons leer wat is ‘n Boelie: “ Deur Wilma Bedford

“Indien jou kind herhaaldelik onderwerp word aan fisiese en verbale aanslae en gebare deur ʼn persoon of ʼn groep persone; jou kind se eiendom doelbewus beskadig word; vrees by jou kind ingeboesem word;  hy/sy emosioneel aangeval word of sy/haar skoolaktiwiteite op enige manier omvergewerp word en sy/haar grondwetlike reg tot vryheid en gelykheid aan bande gelê word; daar word teen hom/haar gediskrimineer op grond van geslag, ras of geloof, of die waardigheid, privaatheid en vryheid van jou kind op enige ander wyse aangetas word…”

Dit is nie net gewone baklei of ouderdomsgepaste gedrag nie. In ons eie grootwordjare is die woord ‘boelie’ ook gebruik, maar nie so vrypostig vir elke stryery nie. 

Tweedens het ons hoofsaaklik op die skool se waardes gefokus. Wanneer ons die waardes uitleef sal boeliegedrag klaar minder wees. Hierdie het my baie diep laat dink, wanneer ek na die skool se waardes kyk: Leef ek hierdie waardes by my huis uit ? Wat beteken dit vir ons as gesin? Kinders word met ‘n skoon lewensbladsy gebore, maar word gedurende hul eerste vormingsjare deur ervarings gevorm. Ons as ouers: Hoe hanteer ek my eie kinders. Kan hulle by my hierdie lewensbelangrike waardes leer? 

• Omgee is een van die makliker waardes. Omgee is om vriendelikheid en besorgdheid teenoor ander te betoon. Die vraag wat ek myself afvra: wys ek dat ek omgee vir mense rondom my? Doen ek dit met enige persoon en gee ek vir enige medemens om wat dalk ‘n ander leefstyl as ek handhaaf? Hoe kan my kind by my leer van omgee sodat hy/sy kan omgee in die skool opset met maats wat dalk anders of minder gewild is?
• Respek is gelykstaande aan eerbied, waardering en erkenning vir ‘n persoon. Respek is een van die belangrikste morele waardes. Respekteer ek my kind se onderwyser en sy outoriteit in sy of haar klas? Of praat ek negatief van hulle voor my kind? Wat kan veroorsaak dat my kind nie vir hulle respek toon nie? Doen ek dalk iets wat my kind se respek vir my skaad? Respekteer ek my kind se ander ouer en praat ek ‘n taal wat opbou of afbreek? Die stemtoon wat ons gebruik is dikwels die stemtoon wat ons kinders gebruik met ander maatjies. Hoe klink ons en wat sê ons?